ព័ត៌មានដែលយើងអាចប្រមូល

យើងអនុវត្តគោលការណ៍ ប្រមូលព័ត៌មានតិចបំផុតតាមដែលចាំបាច់ មានន័យថា យើងប្រមូលតែព័ត៌មានដែលចាំបាច់សម្រាប់ការគាំទ្រករណីរបស់អ្នកប៉ុណ្ណោះ។

3.1 ព័ត៌មានដែលអ្នកចែករំលែក

យើងប្រមូលព័ត៌មានដែលអ្នកជ្រើសរើសចែករំលែកជាមួយយើង ដូចជា៖

• ឈ្មោះ ឬឈ្មោះហៅក្រៅ
• អត្តសញ្ញាណភេទ
• ព័ត៌មានសម្រាប់ទំនាក់ទំនង
• ទីតាំងទូទៅ
• ស្ថានភាពរបស់អ្នកតាមការពិពណ៌នា

3.2 វេទិកាដែលបានប្រើ

យើងមិនថតសំឡេង ឬវីដេអូនោះទេ ហើយយើងប្រើមុខងារលុបសារដោយស្វ័យប្រវត្តិនៅលើតេឡេក្រាម។

អាស្រ័យលើវេទិកាដែលអ្នកប្រើសម្រាប់ទាក់ទងយើង ព័ត៌មានបច្ចេកទេសមានកម្រិត ដូចជាប្រភេទឧបករណ៍ អាចត្រូវបានប្រមូលដោយស្វ័យប្រវត្តិ។

អ្នកអាចជ្រើសរើសមិនបង្ហាញអត្តសញ្ញាណ នៅពេលប្រើប្រព័ន្ធគ្រប់គ្រងករណីដែលមានសុវត្ថិភាពរបស់យើង (Online Ambulance platform)។

3.3 ព័ត៌មានសម្រាប់ការបញ្ជូន ឬការដោះស្រាយករណីបន្ថែម

ជំនួយបច្ចេកទេស៖ ប្រសិនបើអ្នកស្នើសុំជំនួយដើម្បីដកមាតិកាដែលបង្កគ្រោះថ្នាក់ចេញពីវេទិកាអនឡាញ យើងអាចស្នើឱ្យអ្នកចែករំលែកតំណភ្ជាប់ (URLs) ដែលពាក់ព័ន្ធនឹងមាតិកានោះ។

ជាទូទៅ យើងមិនតម្រូវឱ្យមានរូបថតអេក្រង់ទេ។ ទោះជាយ៉ាងណា ក្នុងករណីខ្លះ វេទិកាមួយអាចស្នើសុំភស្តុតាងបន្ថែម ដូចជា រូបថតអេក្រង់ ដើម្បីដំណើរការរបាយការណ៍។

ប្រសិនបើករណីនេះកើតឡើង យើងនឹងជូនដំណឹងដល់អ្នក និងស្នើសុំការយល់ព្រមរបស់អ្នក មុនពេលប្រមូល ឬចែករំលែកសម្ភារៈបន្ថែមណាមួយ។

3.4 ការគាំទ្រផ្លូវចិត្ត

អ្វីគ្រប់យ៉ាងដែលអ្នកចែករំលែកជាមួយអ្នកប្រឹក្សាផ្លូវចិត្តរបស់យើង មិនថាតាមការហៅទូរសព្ទ ឬសារជាអក្សរនឹងត្រូវបានរក្សាជាការសម្ងាត់។

ដើម្បីធានាថាអ្នកទទួលបានការគាំទ្រដែលល្អបំផុត អ្នកប្រឹក្សាអាចចែករំលែកតែព័ត៌មានអប្បបរមាដែលចាំបាច់ ដូចដែលបានរៀបរាប់ក្នុងផ្នែក 3.1 នៅក្នុងក្រុមសេវាជំនួយ សម្រាប់ការសម្របសម្រួលផ្ទៃក្នុង ឬការត្រួតពិនិត្យ។

ព័ត៌មានអាចត្រូវបានចែករំលែកក្រៅក្រុមបានតែក្នុងស្ថានភាពដូចខាងក្រោម៖

• ប្រសិនបើមានហានិភ័យនៃគ្រោះថ្នាក់ដល់អ្នកផ្ទាល់ ឬអ្នកដទៃ ដូចជា ការធ្វើបាបខ្លួនឯង ឬការគំរាមប្រើអំពើហិង្សា
• ប្រសិនបើចាំបាច់ត្រូវទាក់ទងអាជ្ញាធរពាក់ព័ន្ធ ឬអាណាព្យាបាល/បុគ្គលដែលអ្នកទុកចិត្ត និងបានយល់ព្រម ដើម្បីការពារសុវត្ថិភាពរបស់អ្នក
• ដោយមានការយល់ព្រមយ៉ាងច្បាស់ពីអ្នក សម្រាប់គោលបំណងគាំទ្រជាក់លាក់

3.5 ការរៀបចំឯកសារ និងរក្សាទុកភស្តុតាង

តាមសំណើ ឬការយល់ព្រមរបស់អ្នក យើងអាចគាំទ្រអ្នកក្នុងការរៀបចំឯកសារករណី ដើម្បីជួយរក្សាភស្តុតាងសម្រាប់កំណត់ត្រាផ្ទាល់ខ្លួនរបស់អ្នក ការរាយការណ៍ ឬគោលបំណងផ្នែកច្បាប់ដែលអាចមាននាពេលអនាគត។

3.5.1 ការរៀបចំឯកសារដោយខ្លួនឯង (ណែនាំសម្រាប់ករណីភាគច្រើន)

យើងនឹងណែនាំអ្នកអំពីរបៀបរៀបចំ និងរក្សាទុកភស្តុតាងដោយខ្លួនឯងដោយសុវត្ថិភាព។ វាអាចរួមមាន៖

• រក្សាទុកតំណភ្ជាប់ កាលបរិច្ឆេទ ពេលវេលា និង metadata ដែលពាក់ព័ន្ធ
• ប្រើឧបករណ៍រក្សាទុកគេហទំព័រដែលមានសុវត្ថិភាព ដើម្បីថតទុកមាតិកាមុនពេលវាត្រូវបានលុប
• យល់ដឹងថាព័ត៌មានអ្វីខ្លះអាចមានប្រយោជន៍សម្រាប់ការរាយការណ៍ ឬដំណើរការផ្លូវច្បាប់

អ្នកនៅតែមានសិទ្ធិគ្រប់គ្រងពេញលេញលើអ្វីដែលអ្នកជ្រើសរើសរៀបចំឯកសារ និងចែករំលែក។

3.5.2 ការជួយរៀបចំឯកសារ (សម្រាប់ករណីដែលមានអាទិភាពខ្ពស់)

ក្នុងស្ថានភាពជាក់លាក់ ដូចជា ករណីពាក់ព័ន្ធនឹងមេដឹកនាំស្ត្រី អ្នកការពារសិទ្ធិមនុស្ស អ្នកសារព័ត៌មាន និងសកម្មជន យើងអាចផ្តល់ជំនួយក្នុងការរៀបចំ និងរក្សាទុកមាតិកាជំនួសអ្នក ជាពិសេសនៅពេលមានហានិភ័យថាភស្តុតាងអាចត្រូវបានលុប ឬបាត់បង់យ៉ាងឆាប់រហ័ស។

ប្រសិនបើយើងធ្វើដូច្នេះ៖

• យើងនឹងពន្យល់ដំណើរការឱ្យបានច្បាស់ និងស្នើសុំការយល់ព្រមរបស់អ្នក មុនពេលចាប់ផ្តើម
• យើងនឹងប្រមូល និងរក្សាទុកតែព័ត៌មានអប្បបរមាដែលចាំបាច់ ដូចដែលបានរៀបរាប់ក្នុងផ្នែក 3.1
• យើងនឹងគ្រប់គ្រងឯកសារទាំងអស់ដោយសុវត្ថិភាព និងស្របតាមការអនុវត្តការពារទិន្នន័យរបស់យើង

3.5.3 ការបញ្ជូនផ្នែកច្បាប់ និងការបញ្ជូនទៅសេវាផ្សេងៗ

ក្នុងករណីខ្លះ យើងអាចណែនាំឱ្យអ្នកភ្ជាប់ទំនាក់ទំនងជាមួយអង្គការខាងក្រៅ ដូចជា អ្នកផ្តល់ជំនួយផ្នែកច្បាប់ អង្គការសង្គមស៊ីវិល ឬសេវាឯកទេស ដែលអាចផ្តល់ការគាំទ្របន្ថែម។ អ្នកតែងតែមានសិទ្ធិទទួលយក ឬបដិសេធការបញ្ជូនណាមួយ។

ប្រសិនបើការបញ្ជូនសមស្រប៖

• យើងនឹងពន្យល់ជម្រើសរបស់អ្នកឱ្យបានច្បាស់ មុនពេលធ្វើការបញ្ជូនណាមួយ
• យើងនឹងចែករំលែកព័ត៌មានរបស់អ្នកជាមួយអង្គការដៃគូ តែបន្ទាប់ពីទទួលបានការយល់ព្រមយ៉ាងច្បាស់ពីអ្នក
• យើងនឹងចែករំលែកតែព័ត៌មានអប្បបរមាដែលចាំបាច់ ដើម្បីសម្រួលដល់ការផ្តល់ជំនួយ