ຂໍ້ມູນທີ່ພວກເຮົາອາດເກັບກຳ

ພວກເຮົາປະຕິບັດຫຼັກການ ເກັບກຳຂໍ້ມູນໃຫ້ໜ້ອຍທີ່ສຸດເທົ່າທີ່ຈຳເປັນ, ໝາຍຄວາມວ່າ ພວກເຮົາຈະເກັບສະເພາະຂໍ້ມູນ ທີ່ຈຳເປັນຕໍ່ການຊ່ວຍເຫຼືອກໍລະນີຂອງທ່ານ.

3.1 ຂໍ້ມູນທີ່ທ່ານແບ່ງປັນ

ພວກເຮົາເກັບກຳຂໍ້ມູນທີ່ທ່ານເລືອກແບ່ງປັນກັບພວກເຮົາ ເຊັ່ນ:

• ຊື່ ຫຼື ຊື່ຫຼິ້ນ
• ເພດ
• ຂໍ້ມູນຕິດຕໍ່
• ພື້ນທີ່ ຫຼື ທີ່ຕັ້ງໂດຍທົ່ວໄປ
• ສະຖານະການຕາມທີ່ທ່ານອະທິບາຍ

3.2 ແພລດຟອມທີ່ໃຊ້

ພວກເຮົາບໍ່ບັນທຶກສຽງ ຫຼື ວິດີໂອຂອງການໂທ ແລະ ພວກເຮົາໃຊ້ຟີເຈີຂໍ້ຄວາມທີ່ຫາຍໄປເອງໃນ Telegram.

ຂຶ້ນກັບແພລດຟອມທີ່ທ່ານໃຊ້ເພື່ອຕິດຕໍ່ພວກເຮົາ, ຂໍ້ມູນທາງເຕັກນິກທີ່ຈຳກັດ ເຊັ່ນ ປະເພດອຸປະກອນ ອາດຖືກເກັບກຳອັດຕະໂນມັດ.

ທ່ານສາມາດເລືອກບໍ່ເປີດເຜີຍຕົວຕົນ ເມື່ອໃຊ້ລະບົບຈັດການກໍລະນີທີ່ປອດໄພຂອງພວກເຮົາ (Online Ambulance platform).

3.3 ຂໍ້ມູນສຳລັບການສົ່ງຕໍ່ ຫຼື ຍົກລະດັບກໍລະນີ

ການຊ່ວຍເຫຼືອດ້ານເຕັກນິກ: ຖ້າທ່ານຂໍຄວາມຊ່ວຍເຫຼືອເພື່ອລຶບເນື້ອຫາທີ່ເປັນອັນຕະລາຍ ອອກຈາກແພລດຟອມອອນລາຍ, ພວກເຮົາອາດຂໍໃຫ້ທ່ານແບ່ງປັນລິ້ງ (URLs) ທີ່ກ່ຽວຂ້ອງກັບເນື້ອຫານັ້ນ.

ໂດຍທົ່ວໄປ ພວກເຮົາບໍ່ຕ້ອງການຮູບໜ້າຈໍ. ແຕ່ໃນບາງກໍລະນີ ແພລດຟອມອາດຂໍຫຼັກຖານເພີ່ມເຕີມ ເຊັ່ນ ຮູບໜ້າຈໍ ເພື່ອດຳເນີນການຕໍ່ລາຍງານ.

ຖ້າສິ່ງນີ້ເກີດຂຶ້ນ, ພວກເຮົາຈະແຈ້ງໃຫ້ທ່ານຮູ້ ແລະ ຂໍຄວາມຍິນຍອມຈາກທ່ານ ກ່ອນເກັບກຳ ຫຼື ແບ່ງປັນຫຼັກຖານເພີ່ມເຕີມ.

3.4 ການຊ່ວຍເຫຼືອດ້ານອາລົມ

ທຸກສິ່ງທີ່ທ່ານແບ່ງປັນກັບທີ່ປຶກສາຂອງພວກເຮົາ, ບໍ່ວ່າຜ່ານການໂທ ຫຼື ບໍລິການຂໍ້ຄວາມ, ຈະຖືກຮັກສາເປັນຄວາມລັບ.

ເພື່ອໃຫ້ທ່ານໄດ້ຮັບການຊ່ວຍເຫຼືອທີ່ດີທີ່ສຸດ, ທີ່ປຶກສາອາດແບ່ງປັນສະເພາະຂໍ້ມູນຂັ້ນຕ່ຳ ທີ່ຈຳເປັນຕາມທີ່ລະບຸໃນພາກ 3.1 ພາຍໃນທີມສາຍດ່ວນ ເພື່ອການປະສານງານພາຍໃນ ຫຼື ການກຳກັບຕິດຕາມ.

ຂໍ້ມູນອາດຖືກແບ່ງປັນອອກນອກທີມໄດ້ສະເພາະໃນສະຖານະການຕໍ່ໄປນີ້:

• ຖ້າມີຄວາມສ່ຽງວ່າທ່ານ ຫຼື ຜູ້ອື່ນຈະໄດ້ຮັບອັນຕະລາຍ ເຊັ່ນ ການເຮັດຮ້າຍຕົນເອງ ຫຼື ການຂົ່ມຂູ່ວ່າຈະໃຊ້ຄວາມຮຸນແຮງ
• ຖ້າຈຳເປັນຕ້ອງປະສານກັບໜ່ວຍງານທີ່ກ່ຽວຂ້ອງ ຫຼື ຜູ້ປົກຄອງ/ບຸກຄົນທີ່ທ່ານໄວ້ວາງໃຈ ແລະ ຍິນຍອມ ເພື່ອຄວາມປອດໄພຂອງທ່ານ
• ເມື່ອທ່ານໃຫ້ຄວາມຍິນຍອມຢ່າງຊັດເຈນ ສຳລັບຈຸດປະສົງການຊ່ວຍເຫຼືອສະເພາະ

3.5 ການຈັດເຮັດເອກະສານ

ພວກເຮົາອາດຊ່ວຍທ່ານ ຕາມຄຳຂໍ ຫຼື ຄວາມຍິນຍອມຂອງທ່ານ ໃນການຈັດເຮັດເອກະສານກ່ຽວກັບກໍລະນີ ເພື່ອຊ່ວຍເກັບຮັກສາຫຼັກຖານ ສຳລັບບັນທຶກຂອງທ່ານເອງ, ການລາຍງານ ຫຼື ຈຸດປະສົງທາງກົດໝາຍທີ່ອາດເກີດຂຶ້ນ.

3.5.1 ການຈັດເຮັດເອກະສານດ້ວຍຕົນເອງ (ແນະນຳສຳລັບກໍລະນີສ່ວນໃຫຍ່)

ພວກເຮົາຈະແນະນຳທ່ານວິທີຈັດເຮັດ ແລະ ຮັກສາຫຼັກຖານດ້ວຍຕົນເອງຢ່າງປອດໄພ. ນີ້ອາດລວມມີ:

• ບັນທຶກລິ້ງ, ວັນເວລາ ແລະ metadata ທີ່ກ່ຽວຂ້ອງ
• ໃຊ້ເຄື່ອງມື web archiving ທີ່ປອດໄພ ເພື່ອເກັບເນື້ອຫາກ່ອນທີ່ຈະຖືກລຶບ
• ເຂົ້າໃຈວ່າຂໍ້ມູນໃດອາດມີປະໂຫຍດສຳລັບການລາຍງານ ຫຼື ຂະບວນການທາງກົດໝາຍ

ທ່ານຍັງຄົງມີສິດຄວບຄຸມຢ່າງເຕັມທີ່ ວ່າຈະເກັບບັນທຶກ ແລະ ແບ່ງປັນຫຍັງ.

3.5.2 ການຊ່ວຍຈັດເຮັດເອກະສານ (ສຳລັບກໍລະນີທີ່ມີຄວາມສຳຄັນສູງ)

ໃນບາງສະຖານະການ ເຊັ່ນ ກໍລະນີຂອງຜູ້ນຳແມ່ຍິງ, ນັກປົກປ້ອງສິດທິມະນຸດ, ນັກຂ່າວ ແລະ ນັກເຄື່ອນໄຫວ, ພວກເຮົາອາດສະເໜີຊ່ວຍບັນທຶກ ແລະ ຈັດເກັບເນື້ອຫາແທນທ່ານ, ໂດຍສະເພາະຖ້າມີຄວາມສ່ຽງວ່າ ຫຼັກຖານອາດຖືກລຶບ ຫຼື ສູນຫາຍຢ່າງໄວວາ.

ຖ້າພວກເຮົາດຳເນີນການນີ້:

• ພວກເຮົາຈະອະທິບາຍຂະບວນການໃຫ້ຊັດເຈນ ແລະ ຂໍຄວາມຍິນຍອມຈາກທ່ານກ່ອນດຳເນີນການ
• ພວກເຮົາຈະເກັບກຳ ແລະ ຈັດເກັບສະເພາະຂໍ້ມູນຂັ້ນຕ່ຳທີ່ຈຳເປັນ ຕາມທີ່ລະບຸໃນພາກ 3.1
• ພວກເຮົາຈະຈັດການເອກະສານທັງໝົດຢ່າງປອດໄພ ແລະ ຕາມຫຼັກການປົກປ້ອງຂໍ້ມູນຂອງພວກເຮົາ

3.5.3 ການສົ່ງຕໍ່ດ້ານກົດໝາຍ ແລະ ບໍລິການອື່ນ

ໃນບາງກໍລະນີ, ພວກເຮົາອາດແນະນຳໃຫ້ທ່ານຕິດຕໍ່ອົງກອນພາຍນອກ ເຊັ່ນ ຜູ້ໃຫ້ຄວາມຊ່ວຍເຫຼືອທາງກົດໝາຍ, ອົງກອນພາກປະຊາສັງຄົມ ຫຼື ບໍລິການສະເພາະທາງ ທີ່ສາມາດໃຫ້ການຊ່ວຍເຫຼືອເພີ່ມເຕີມ. ທ່ານມີສິດເລືອກທີ່ຈະຮັບ ຫຼື ປະຕິເສດການສົ່ງຕໍ່ໄດ້ສະເໝີ.

ຖ້າການສົ່ງຕໍ່ມີຄວາມເໝາະສົມ:

• ພວກເຮົາຈະອະທິບາຍທາງເລືອກຂອງທ່ານໃຫ້ຊັດເຈນກ່ອນການສົ່ງຕໍ່
• ພວກເຮົາຈະແບ່ງປັນຂໍ້ມູນຂອງທ່ານກັບອົງກອນຄູ່ຮ່ວມງານ ສະເພາະເມື່ອທ່ານໃຫ້ຄວາມຍິນຍອມຢ່າງຊັດເຈນ
• ພວກເຮົາຈະແບ່ງປັນສະເພາະຂໍ້ມູນຂັ້ນຕ່ຳທີ່ຈຳເປັນຕໍ່ການຊ່ວຍເຫຼືອ